بیرەوەریەک لە شەهیدی نەمر عەلیرەزا نابدل
شۆرشگێڕی نەمر عەلیرەزا نابدل، رووناکبیری تێگەیشتوو و فیداگاری تورک ، فیدائی راستەقینەی رێگای ئازادی لە ساڵانی ٤٠ ی هەتاوی لە دانشکەدەی حقوقی زانکۆی تاران لە گەڵ زیندە یاد عەلی حەسەنیانی و کاک سەلاحی موهتەدی هاوکەلاس بوون.
پایزی ساڵی ١٣٤١ کاک سەلاح زانکۆی بە جێ هێشت و چوە باشووری کوردستان. کاک عەلی حەسەنیانی و عەلیرەزا نابدل مانەوە و دۆستایەتیان بەردەوام بوو. هەرلەو ساڵە (١٣٤١) زیندە یاد کاک سوارەی ئیلخانیزادەش کە لە زووترەوە نابدلی دەناسی لە زانکۆی تاران وەرگیرا و لە دانشکەدەی حقوق دەستی بە دەرس خوێندن کرد. منیش ئەو ساڵانە لە دانشکەدەی ئیلاهیات ئەمخوێند و دوایی هاتمە دانشکەدەی حقوق.
من عەلیرەزای نابدلم لە رێگای کاک عەلی حەسەنیانیه وە ناسی و جار جار لە دانشکەدە یەکمان دەدی.دوایش کە هەر من و کاک سوارە و نابدل لە دانشکەدە مابووینەوە زۆرتر یەکمان دە بینی. ئەو شێعرەی " چیاکانی کوردستان" هی ئەو سەردەمەیە کە کاک سەلاح لە باشوور پێشمەرگە بوو، دیارە کە مەنزووری لە سەلاحەددین هەر کاک سەلاحە.
دانیشتن لە گەڵ زیندە یادان عەلیرەزا نابدل و سەمەد بێهرەنگی
چەن رۆژێ دوای ئەو دانیشتنە لە خۆپیشاندانەکەی رێز گرتن لە یادی تەختی بە بۆنەی چلەمین رۆژی کوشتن یا مردنی تەختی کاک سەمەد کە بە بۆنەی خۆپیشاندان و رێپێوانەکەوە لە تاران مابووەوە هات بۆ لای من و کاک موسلێح وماوەیەکیش لە گەل ئێمە ڕێی پێوا.
شەهید عەلیرەزا نابدلم ئاخر جار لە ئاخر و ئۆخری هاوین یا لە سەرەتای پایزی ٤٧ لە کووی دانشگا لە ئەمیراباد بینی. پرسیم چدەکا، وتی خەریکم لە دەور و بەری شاری خۆی ببم بە مامۆستا لە دێهات، بەڵام ووتی ئەمە لای خۆمان بێ چونکە پێی خۆش نەبوو کە بۆ بڕێ کەس تەوزیح بدا و روونی کاتەوە بۆ بە لیسانسی حقووقەوە ئەبێ بە مامۆستا لە دێهات و نابێ بە قازی یا وەکیل ( پارێزەر)، لە هەمان کاتا بەو کەسانەی ئەکوت کە ئەوە خەریکی کارامووزی وەکاڵەتە لە ئازەربایجان. هەر ئەو رۆژە کاک عەلیرەزا لە سەر " بەبری کاغەزی ئەمپریالیسم " زۆر قسەی کرد، وا دیار بوو تەسمیمی خۆی بۆ ژیانی شۆڕشگێرانەی حیرفەیی گرتبوو. بوون بە مامۆستا لە دێهاتی ئازەربایجان سەمەد بێهرەنگی کردی بە باو بۆ شۆڕشگێران.
ئێمەش ئەو سەردەمە ووردە ووردە خەریک بووین سەبارەت بە "مەشی چریکی" کە بتوانێ بە بێ بەشداری خەڵک سەر کەوێ ، تووشی دوودڵی دەبووین، چونکە جووڵانەوەی شۆڕشگێڕانەی ٤٦ /٤٧ لە تەواو بوونا بوو و هەموو یا شەهید کرابوون یان دەسبەسەر کرابوون . دیارە من وەکوو ئەو پشتگیریم لە تێزی " بەبری کاغەزی" ئەمپریالیسم نەکرد.
عەلیرەزا وتی ئەو هەر ئەو رۆژە بەرەو خۆی وەڕێ ئەکەوێ. دوای ئەو رۆژە ئیتر نەم دیەوە تا خەبەری شەهید بوونی هات کە کاک سەلاح باسی کردوە چۆن لە خەستە خانەی شارەبانی تاران خۆی خستە خوارەوە بۆ ئەوەی کە نەکا لە ژێر شکەنجە هاورێیەک یا قەرارێکی خۆی ئاشکرا بکا..
برا چووکەکەی عەلی رەزا کە خوێدکاری زانکۆی تەورێز بوو لە ساڵی ٤٥ بە هۆی چالاکی خوێندکاری گیرا و ناردرا بۆ سەربازی. ئەو برایە لە گەڵ شەهید بهرووزی ئەرمۆغانی لە زانکۆی تەورێز هاو دەورە بوون، رەنگە شەهید بهرووز کە ئەندامێکی زۆر چالاکی چریکی فیدایی بوو لە رێگای براکەی عەلیرەزاوە لە گەڵ عەلیرەزا ئاشنا بووبێت و پێکەوە لە یەک رێکخراو دا چالاکیان کردبێ.
ستۆکهۆڵم ٢٠١٢،٠٢،٠٤
یەدۆللا بیگلەری
هێندێک لە خوێندکارانی کورد لە زانکۆی تاران ١٣٣٨ی هەتاوی (١٩٥٩) لە ڕاستەوە:نەمر حەمەدەمینی سیراجی، ڕەحمانی شەریفزادە، نەمر سەرداری جاف، سەلاحوددینی موهتەدی و نەمر عەلیی حەسەنیانی
بەڕێز یەدوڵای بیگلەری
تێبینی: زۆرسپاسی بەڕێز یەدوڵای بیگلەری دەکەین کە داوای ئێمەی پەژراند و بیرەوەری خۆی لەگەڵ نەمر عەلیڕەزا نابدڵ بۆ ناردین. وێنەیەکی دیکەی خوێندکارانی کورد لە ماڵی بەڕێز هێدی لە فەیس بووک وەرگێراوە
درێژه‌ی باس که به‌ڕێز یه‌دوڵای بیگله‌ری بۆ ڕوانگه‌ی ناردووه
ئەوە کە عەلیرەزا نابدل باسی هەژاری مۆکریانی وە ک شۆڕشگێڕێ ئەکا قسە ی دڵیەتی ، چوونکە ئەو زانیاریانە کە گەێشتۆنەتە ئەو زانیاریەک بووە کە لە هاوڕیانی ئەو سەردەمەی خۆی و بە تایبەت کاک سوارەی ئیلخانیزادە و کاک عەلی حەسەنیانی بیستوویە، چوونکە ئەو کوردی نەدەزانی و راستەوخۆ شێعرەکانی هەژاری نەخوێندبوەوە. تا ئەو کاتەش شێعرە کۆنەکانی هەژار و وەرگێرانی مەم و زینی خانی گەیشتبوە تارا دوای ماوەیەک و دوای هاتنەوەی کاک سەلاح لە باشووری کوردستان نوسخەیەکی دەسنووسی شێعری بەرەو موکوریان دواتریش چاپ کراوی کتێبی بۆ کوردستانمان پێ گەیشت
لە "بەرەو موکوریان" هەژار رەخنەی توند لە هێمن دەگرێ کە بۆ بۆ لە دایکبوونی رەزا پەهلەوی شیعری کوتووە
هێمن ئەو بولبولە سەر بێ تووکە چییە لێ نایە چ جووکە و نووکە
باڵی بشکێ و پەرو پۆی هەڵ بوەرێ مەل بکا زەمزەمە بۆ جاشە کەرێ
هەروەها هێڕش ئەکاتە سەر عوبەیدیللا ئەیووبیان کە خەریکی چیە
سەوزە سیس نێوی دەنێ کاری بەجێ نیوە نووزەی مەم و سیامەند و خەجێ
کاک عەلی حەسەنیانی لە جوابی هەژارا شێعرێکی دانا کە من بەداخەوە گشت شێعرەکەم لە بیر نەماوە، بەڵام وا دەست پێ ئەکا
بۆچی پێت وایە لە ڕێەکی چەتوون رێەکی پڕڕ هەڵە بوون هەر ئەتۆ بردتە سەرێ، بۆچی پێت وایە لە نێو دارانا داری تۆ هاتە بەرێ .......هەتا دوایی
ئەو کات بیر و بروای گشتی ئەو کۆڕە دانشجووئیە حە‌ققی بە هەژار دەدا و پشتگری شێعرەکەی ئەوی دەکرد. تەنانەت کاک سوارە لە شێعرێکدا کوتایە سەر کاک عەلی و بە توندی جوابێکی نا شایستی پیێ داوە کە جوان نەبووئەو سەردەمە ئێمە هەژارمان پێ شاعێرێکی تێکۆشەر، و شۆڕشگێر و خەڵکی بوو .لە یەکێ لەو کۆمەڵە هەڵبەستانە کە لە بۆ کوردستان چاپ کراوە لە شیعرێک دا هەژار ئەڵێ
خوێنی پیسی ، لەشی سیسی عەرەبان گوڕو فیچقەی بوو لە سەر تێغی دەبان
کاک مۆسلێحی شێخەلیسلامی( ڕێبوار) تەنیا کەسێ بوو کە ئەو شێعرەی پێ فاشیستی بوو، کە وایچە، بەڵام بە داخەوە ئێمە نەک رەخنەیەکمان لەو شێعرە نەگرت بەڵکوو چاوپۆشیشمان کرد.چگە لەوانە هەژار بەرانبەر بە سەرکردایەتی ئەو سەردەمەی پارتی و بە تایبەت دەفتەری سیاسی و لەوانە مامۆستا برایم ئەحمەد و مام جەلال زۆر جنێوی ناشیرین ئەدا و قسەی ناخۆش ئەکا،
ئێستا کە نووسراوەکەی شێرکۆ هەژار بڵاو بووە تەوە ئەزانین هەژار چۆن شەخسیەتێک بووە. من بەش بە حاڵی خۆم قسەکانی شێرکۆ هەژارم پێ راستە، چوونکە پێم وانیە کەس درٶ بۆ باوکی خۆی هەڵبەسێ،
یەدی بیگلەری ستۆکهۆلم 2012-02-07
No comments:
Post a Comment