پرسیاری نوێنەری کوردی پارڵمانی بریتانیا (هاوس ئاف کامنس) لە جێگری سەرۆکوەزیر لە سەر بارودۆخی ڕۆژئاوای کوردستان

  

نیوەڕۆی چوارشەمە ٢٨-ی ژانڤییە، یای فەریاڵ کلارک ( نوێنەری ئێنفیلد نۆرث، ئەندامی پارتیی کرێکار) لە پرسیارو وڵامی حەوتووانەی سەرۆکوەزیری بریتانیا دا باسی ڕۆژئاوای کوردستانی هێنا گۆڕێ. لەبەر ئەوەی سەرۆکوەزیر لە سەفەری چین و ژاپۆنە، جێگری سەرۆکوەزیر و وەزیری داد دیڤید لامی وڵامی دایەوە. لە خوارەوە وەرگێڕ پرسیار و وڵامەکە دەخوێننەوە.

فەریاڵ کلارک ( ئێنفیلد نۆرپ) ( لەیبر)
توندوتێژی لە باکووری ڕۆژهەڵاتی سووریا- ڕۆژئاوا دیسان لە زیادبوون دایە. ئێستا قەیرانێکی ئینسانی دەقەومێ و شاری کۆبانێ دیسان گەمارۆ دراوە. کۆمەڵگە کوردییەکان کە بە دژی داعش شەڕیان کرد و یارمەتی تێکشکاندنیان دا ئێستا هەست دەکەن لەلایەن هاوپەیمانە ڕۆژئاواییەکانیانەوە پشتیان بەردراوە. گەلۆ جێگری سەرۆکوەزیر بەرعۆدە دەبێ لەتەک هاوپەیمانەکانمان کار بکا بۆ ئەوەی ڕێژیمی سووریا ناچار بێ  ڕێکەوتننامەی ٢٥-ی ئازاری ٢٠٢٥ جێ بەجێ بکا ، دەستەبەر بێ بۆ پاراستنی خەڵکی مەدەنی کورد، و  زەخت هێنان بۆ ئاگر بەسێکی ڕاستەقینە و دەستبەجێ، کردنەوەی کۆریدۆران بەرەوە کۆبانێ و پشتیوانی کردن لە بە ڕەسمی ناسینی قانوونی هەرێمە کوردستانییەکان؟

دەیڤید لامی جیگری سەرۆکوەزیری بریتانیا

ڕووداوەکانی ئەو دواییانە لە سووریا بە قووڵی جێی نیگەرانین. ئێستا ئانێکی گرینگە لەداهاتووی سووریا دا، و ئێمە هەموو ئامرازێکی دیپڵۆماتیک بەکار دێنین  بۆ پێداگری لەگەڵ هەموو لایەنەکان بۆ ئەوەی توندوتیژی ڕابگرن، خەڵکی مەدەنی بپارێزن و دڵنیایی بدەن کە پشتیوانی ئینسانی بکرێ بگاتێ و پێشی نەگیرێ. ئەم حەوتوویە وەزیری کاروباری دەرەوەی بریتانیا گرینگی پاراستنی مافەکانی کۆمەڵگەی کوردی بۆ وەزیری کاروباری دەرەوەی سووریا زەق کردەوە، و ئێمە بە بەردەوامی دامانگرتووەتەوە کە سەردەمی تێپەڕی سیاسی دەبێ هەموو لایەک بگرێتەوە. ئێمە بەرعۆدەیی خۆمان لە ئاست خەڵکی سووریا دەپارێزین لە بارودۆخێکدا کە ئەوان خەریکن داهاتوویەکی زۆر بە سیبات تر، ئازادتر و بە ئیروو تر دامەزرێنن.