ئەنجامنامەی کۆتایی کۆنفڕانسی زمان

ئەنجامنامەی کۆتایی کۆنفڕانسی زمان
20120304
کۆنفڕانسی زمانی نەتەوەیی لە ڕۆژانی ٢، ٣ و ٤ی مانگی مارس لە شاری ئامەد بە بەشداریی ٣٠٠ زمانزان، پەروەردەکار، سیاسەتمەدار و نوێنەرانی کۆمەڵگەی مەدەنی، لە هەموو بەشەکانی کوردستان و جیهانەوە پێک هات.لەو کۆنفرانسە دا لە سەر بابەتی وەک دەوری زمان لە یەکێتی نەتەوەیی دا،ئەلفووبێ و لەهجە کوردییەکان، سیستمی پەروەردە و ئاکادێمی زمان ووتار پێشکێش کران. لە ئاکامی لە سەر دوان و هەڵسه‌نگاندنی نوێنەرانی بەشدار لە کۆنفڕانس دا بڕیار درا ئەو داوخواز و پێشنیازانەی خوارەوە پێشکێشی بیروڕای گشتی، کۆنگرەی نەتەوەیی و لایەنی پێوەندیدار بکرێن. کۆنگرەی جڤاکی دێمۆکڕاتیک، ئەو خاڵانەی خوارەوەی کە لە ئەنجامنامە دا هەن ئاشکرا کرد:
1-هەبوونی زاراوە کوردییەکان دەوڵەمەندییە،پاراستن و گەشەپێدانیشیان ئەرکێکی نەتەوەییە.
2-لەم ڕۆژانە دا کە بەسترانی کۆنفڕانسی نەتەوەیی کورد دە ڕۆژەڤ دایە، دەبێ کوردیش خاوەنی بەرنامە و سیاسەتێکی نەتەوەیی زمانی بێ.
3-ئەم کۆنفڕانسە بە ستاندار بوونی هەرکام لە زاراوەکان بە پێویست دەزانێ، بەڵام لە کاتی ئاستە کردنی زاراوەکان دا دەبێ هەر شت بەپێی شێوەی خۆی ئاستە بکرێ.
4-بۆ ئەوەی کورد لە یەکتری تێبگەن و بۆ پێکهاتنی ووشیاریی نەتەوەیی پێویستی بە هەبوونی یەک ئەلفووبێ هەیە. هەتا گەیشتن بەو قوناخە، لە بەر گونجاو بوونی هەلومەرجی باشوور، پێویستە لەوێ هەر دوو ئەلفووبێ لە سیستمی پەروەردە و لە هەموو بوارێکی دیکە دا بەکار بهێندرێن.
5-ئەم کۆنفڕانسە پەروەردە بە زمانی کوردی بە مافێکی تەبیعی و نەتەوەیی دەزانێ بۆیە لە پلەی بەر لە خوێندنگە تا زانکۆ داوخوازی پەروەردە بە زمانی کوردی دەکا، دیارە ئەوەش بە هەبوونی ستاتوسێکی سیاسی پێک دی.
6-کۆنفڕانسی ئێمە لە پێناو ساز کردنی کۆمەڵێکی دێمۆکڕاتیک و پلوڕالیست پێشنیازی سیستمێکی وەهای پەورەردە دەکا کە بەختەوەری و بەرەوپێشبردنی ئینسان بە ئەساس دابنێ.
7-بۆ گەڵاڵە کردنی بەرنامەیەکی زمانیی نەتەوەیی پێویستی بە سازکردنی جووڵانەوەیەکی زمانیی کوردستانی هەیە، بۆ ئەوەی بتوانێ کار و پێویستییەکانی زمانی کوردی جێبەجێ بکا. لەو کۆنفڕانسە دا بۆ سازکردنی جووڵانەوەیەکی ئەوتۆ دەستەیەک کە لە ٣١ کەسان پێک دێ، هەڵبژێردرا.
8-کۆنفڕانس بانگەوازی کوردان دەکا لە هەموو بوارەکانی ژیان دا زمانی کوردی بەکاربهێنن و پێوەی بژین.
9-کۆنفڕانس سڵاو دەکا لە خەبات و تێکۆشینی گەلەکەمان لە باشووری ڕۆژئاوا لە بواری زمان و پەروەردە دا و پشتیوانی خۆی لەوان دەردەبڕێ.
10-ئێمە پشتیوانی خۆمان دەردەبڕین لە داوخوازی زیندانیانی سیاسی کورد بۆ هەبوونی مافی پارێزگاری لە خۆ کردن بە زمانی کوردی.
11-ئێمە سیاسەتی ئاکەپە و هەڵوێستی کاربەدەستەکانی سەبارەت بە زمان و کولتووری کوردی شەرمەزار دەکەین و ئەو سیاسەتە بە بەردەوامکردنی سیاسەتی تواندنەوە و حاشالێکردن دەزانین. هەر بە هەمان شێوە سیاسەتی ڕێژیمەکانی دیکەش لە ئاست کوردان بە هیچ جۆر ناپەژرێنین.
12-کۆنفڕانسی ئێمە ئەو ئۆپێڕاسیۆنە نیزامی و سیاسییانەی کە لە سەر کوردان بەڕێوەدەچن شەرمەزار دەکا و بۆ چارەسەری پێشنیازی دیالۆگ و موزاکەرە دەکا.
13-منداڵ بۆ بەرەوپێشبردنی زمانی کوردی زۆر گرینگن. بۆیە لە سیاسەت و بەرنامەی زمانی نەتەوەیی دا دەبێ جێیەکی تایبەت تەرخان بکرێ بۆ منداڵان
سەرچاوە: ئاژانسی دەنگوباسی دیجلە