شەڕ و ململانێی ((مەلایی)) و ((جەلالی(( - لە زاری ڕێبەرانی سازمانی ئینقیلابییەوە - شوان ئەحمەد

Shwan Ahmad 

شەڕ و ململانێی ((مەلایی)) و ((جەلالی((

- لە زاری ڕێبەرانی سازمانی ئینقیلابییەوە -

شوان ئەحمەد

شەستەکان، ساڵانی وەرچەرخانی کۆمەڵگەی ئێمەبوو بەرەو دڕندەیی. لەو ساڵانەوە پەلاماری یەکدی و سەرکوتکردنی سیاسی و خنکاندنی ئازادییەکان، دەستی پێکرد. لە شەستەکاندا شەیتان بە تەواوەتی هات بۆ سلێمانی، پێشتر تەنیا سەردانی دەکرد. بڕوانە:(مەریوان هەڵەبجەیی: گفتوگۆیەکی درێژ لەگەڵ بەختیار عەلی لەهەژدە بەشدا – ڕەخنەی چاودێر – لە تشرینی دووەمی ٢٠٠٧ بۆ ئاداری ٢٠٠٨).

بەشێکی ئەم کتێبە (سازمانی ئینقیلابی و کوردستان) کە پاییزی ئەمساڵ چاپکراوەو بە قەوارەی (٦٠٧) لاپەڕەیە، ماجەرای ئەو قۆناغە دزێو و تاریکەیە(قۆناغی نیشتەجێبوونی ئەهریمەن لە سلێمانی). قۆناغێک شەڕی نێوخۆیی و کورد کوژی دەکاتە کردەیەکی ئاسایی و سروشتی و تا ئانوساتی ئێستامان، بە شێوازی جۆراوجۆر درێژەی دەبێت و دەمەزەرد دەکرێتەوە.

ئێمە لە زاری شایەدحاڵەکانی ئەو سەردەمەوە:( کۆرش لاشایی، سیاوەش پارسا نەژاد، ئیرەج کەشکۆڵی، موحسین ڕێزوانی) کە کادێری باڵا و هەڵسوڕاوی دیاری نێو ڕێکخراوی سازمانی ئینقیلابی ئێران بوون و لە کۆتایی شەستەکانی سەدەی ڕابردوودا، دێنە بەکرەجۆ و پەیوەندی لەگەڵ باڵی مەکتەبی سیاسی پارتی دیموکراتی کوردستان دەگرن، لە بەشێکی مێژووی دورودرێژی شەڕی خوێناوی نێوان باڵی مەلایی و جەلالی ئاگاداردەبین.

کتێبەکە دیکۆمێنتێکی مێژوویی گرنگە، بۆ تێگەیشتن لە زۆرێک لە وردەکارییەکانی ئەو قۆناغەو بینینی ئەو تراژیدیا و مەرگەساتەی، جەلالی و مەلایی بەناوی کوردایەتی و بزوتنەوەی ڕزگاریخوازی کوردییەوە، سازیان داوە.

ئەگەرچی ئەدەبیاتی حیزبی ئەو دوو ڕەوتە، پڕیەتی لە شانازی و ئەفسانە و فانتازیای خەبات و شۆڕشگێڕی و کوردایەتی، لێ خۆ لە قەرەی ناشیرینترین خویەک نادەن کە خەسڵەتی هەردووکیان بووە لە سەرەتاوە تا ئێستاو دەستبەرداری نەبوون، ئەویش پاشکۆیایەتی و گوێ لەمستی دەوڵەتانی خوێنەخۆ و داگیرکەرانی کوردستان بووە.

لەم کتێبەدا ئەو پرسە پشتڕاست دەکرێتەوەو (کۆرش لاشایی) وەک دیارترین کارەکتەری سیاسی سازمانی ئینقیلابی و یەکێک لەوانەی زۆرترین ماوە لە بەکرەجۆ و سلێمانی و هەڵەبجە ماوەتەوە، لە وەڵامی پرسیارێکی حەمید شەوکەتدا دەڵێت:( ئەم دوو لایەنە بە شەڕهاتووەی کوردایەتی، هەریەک لە لایەن دەوڵەتێکەوە هاندەدران و پشتیوانی دەکران، مەلا مستەفا بارزانی لە لایەن ئێرانەوە پشتیوانی لێدەکراو جەلال تاڵەبانی لە لایەن عێراقەوە).

ڕەنگە هەموو ئەو هەڵەوپەڵەو دزێویانەی لە ململانێی ناقۆڵا و درێژ خایەنی جەلالی و مەلایی کەوتۆتەوە و دەکەوێتەوە، بە کتێب و چەند وتار و ڕوماڵکردنێک کۆتایی نەیەت، وەک چاوساغی کردن بۆ وڵاتانی داگیرکاری کوردستان و دەستکێشی دەستی بێگانەو کورد کوژی و زیان گەیاندن بە بزوتنەوەی ڕزگاریخوازی گەلی کورد و .... هتد، بەڵام ئەم کتێبە سەرچاوەیەکی گرنگە بۆ بیستنی هەندێ زانیاری نوێ کە ڕەنگە لە نووسراوی دیکە و بەرهەمی تردا دەسگیرمان نەبێت.